اسلام آباد: چیف الیکشن کمشنر سکندر سلطان راجہ نے کہا ہے کہ آج کے ضمنی انتخابات پرامن رہے اور اس دوران ٹرن آؤٹ کم ہونے کی کئی وجوہات ہیں۔ میڈیا سے گفتگو کرتے ہوئے انہوں نے پنجاب اور خیبرپختونخوا کی حکومتوں کا شکر ادا کیا۔
چیف الیکشن کمشنر نے بتایا کہ ضمنی انتخابات میں ہمیشہ ووٹرز کی شرکت کم رہتی ہے اور اس کے کئی اسباب ہوتے ہیں۔ ان کا کہنا تھا کہ اس الیکشن میں نمبر گیم کی تبدیلی نہیں ہونی تھی، جس کی وجہ سے عوام کی دلچسپی کم رہی۔
انہوں نے مزید کہا کہ ضلعی ریٹرننگ آفیسرز (ڈی آر اوز) نے کچھ رپورٹس کمیشن کو بھیجی ہیں اور بعض شکایات پر کمیشن نے خود نوٹس لیا ہے۔ آج کے ضمنی انتخابات میں کوئی غیر معمولی شکایات موصول نہیں ہوئیں۔ چیف الیکشن کمشنر نے یہ بھی بتایا کہ طلال چودھری کو کل طلب کیا گیا ہے اور سماعت ہوگی۔
سکندر سلطان راجہ نے کہا کہ لوکل گورنمنٹ انتخابات میں ضابطہ اخلاق کی خلاف ورزی پر ایک وزیر اور امیدوار کو نااہل کیا گیا تھا، اور ہر چیز کے لیے ایک قانونی نظام موجود ہے۔ انہوں نے مزید واضح کیا کہ کمیشن وقتاً فوقتاً اپنی تجاویز حکومت کو بھیجتا رہتا ہے، لیکن کمیشن کے پاس ٹربیونل کو ہدایات دینے کا اختیار نہیں ہے۔
