لاہور: پاکستان سپر لیگ (پی ایس ایل) کی فرنچائز لاہور قلندرز نے ای وائی کی ویلیوایشن کے بعد اپنے معاہدے کو مزید 10 سال کے لیے تجدید کر لیا ہے۔
چیئرمین پاکستان کرکٹ بورڈ (پی سی بی) محسن نقوی نے کہا کہ لاہور قلندرز کی جانب سے معاہدے کی تجدید پی ایس ایل پر اعتماد اور لیگ کی کامیابی پر یقین کا ثبوت ہے۔ ان کا کہنا تھا کہ لاہور قلندرز کے مالکان نے اپنی فرنچائز کو ایک عالمی معیار کے برانڈ میں تبدیل کر دیا ہے۔
پی ایس ایل کے سی ای او سلمان نصیر نے کہا کہ اگلے سال لیگ کا 11 ویں ایڈیشن منعقد ہوگا جس میں ٹیموں کی تعداد بڑھ کر 8 ہو جائے گی۔ انہوں نے لاہور قلندرز کی جذبہ، توانائی اور ٹیلنٹ نرسری کو لیگ کی پہچان قرار دیا اور کہا کہ اس نے پاکستان کرکٹ میں نیا خون داخل کیا ہے۔
واضح رہے کہ شاہین شاہ آفریدی کی قیادت میں لاہور قلندرز نے گزشتہ 4 سال میں تین پی ایس ایل ٹائٹل جیتے ہیں، اور پی سی بی نے لاہور قلندرز کے ساتھ اپنی مضبوط شراکت داری جاری رکھنے کا عزم بھی ظاہر کیا ہے۔
