راولپنڈی: فیلڈ مارشل سید عاصم منیر نے کہا ہے کہ قومی سلامتی ہر حال میں اولین ترجیح ہے اور پاک فوج وفاقی و صوبائی حکومتوں کے ساتھ مل کر ملک میں امن و استحکام کے لیے اپنا تعاون جاری رکھے گی۔
آئی ایس پی آر کے مطابق نیشنل سکیورٹی ورکشاپ کے شرکاء نے جی ایچ کیو کا دورہ کیا جہاں انہیں پاکستان کی داخلی و خارجی سکیورٹی صورتحال سے متعلق جامع بریفنگ دی گئی۔ ورکشاپ کے شرکاء میں پارلیمنٹیرینز، سول و فوجی افسران، ماہرینِ تعلیم اور سول سوسائٹی کے نمائندے شامل تھے۔
شرکاء نے فیلڈ مارشل عاصم منیر سے ملاقات بھی کی، جس میں خطے کی بدلتی صورتحال، سرحد پار دہشتگردی، ہائبرڈ خطرات، جیو پولیٹیکل چیلنجز اور قومی سلامتی کے دیگر اہم امور پر تبادلہ خیال کیا گیا۔ انہیں اسمگلنگ، انسداد منشیات، خطرناک جرائم کے خلاف کارروائیوں اور غیر ملکیوں کی وطن واپسی کے اقدامات سے بھی آگاہ کیا گیا۔
اس موقع پر فیلڈ مارشل عاصم منیر نے کہا کہ پاکستان ایک اہم ملک ہے اور اپنی محنت، یکجہتی اور قومی اتحاد سے دنیا میں بہترین مقام حاصل کرے گا۔ انہوں نے کہا کہ دشمن کے تمام مذموم عزائم کو قومی یکجہتی اور مضبوط ادارہ جاتی تعاون سے ناکام بنایا جائے گا۔
ان کا کہنا تھا کہ ہر شہری کا تحفظ پاک فوج کی اولین ترجیح ہے اور پاکستان کی علاقائی سالمیت پر کوئی سمجھوتہ نہیں کیا جائے گا۔ انہوں نے کہا کہ پاک فوج، خفیہ ادارے اور سکیورٹی ادارے تمام چیلنجز کا پیشہ ورانہ صلاحیتوں سے جواب دے رہے ہیں۔
فیلڈ مارشل نے اس عزم کا اعادہ کیا کہ پاک فوج وفاقی اور صوبائی حکومتوں کے ساتھ مل کر امن، استحکام اور خوشحالی کے لیے مشترکہ کوششیں جاری رکھے گی اور ان قومی مقاصد پر کسی بھی صورت سمجھوتہ نہیں کیا جائے گا۔
