واشنگٹن حملے میں زخمی ہونیوالی خاتون گارڈ دم توڑ گئی: امریکی صدر کی تصدیق

واشنگٹن : امریکی صدر ڈونلڈ ٹرمپ نے تصدیق کی ہے کہ گزشتہ روز واشنگٹن میں ہونے والے حملے میں زخمی ہونے والی خاتون گارڈ زخموں کی تاب نہ لاتے ہوئے ہلاک ہوگئی، جبکہ ایک اور اہلکار تشویشناک حالت میں زیرِ علاج ہے۔ میڈیا سے گفتگو کرتے ہوئے صدر ٹرمپ نے کہا کہ ملک میں غیر قانونی طور پر داخل ہونے والے افراد سیکیورٹی کے لیے سنگین خطرات کا باعث بن رہے ہیں، اور اسی حوالے سے انہوں نے متعلقہ حکام کے ساتھ اہم بات چیت بھی کی ہے۔

صدر ٹرمپ نے بتایا کہ نیشنل گارڈز پر حملہ کرنے والے شخص کی حالت بھی نازک ہے، جبکہ امریکی فورسز ملک کی حفاظت کے لیے بھرپور عمل کر رہی ہیں۔ انہوں نے مزید کہا کہ وینزویلا کے حوالے سے امریکا جلد واضح اور سخت اقدام کرے گا۔ ٹرمپ نے انکشاف کیا کہ کچھ ہی دیر قبل مزید B2 اسٹریٹیجک طیاروں کا آرڈر دیا گیا ہے۔

اپنے بیان میں صدر ٹرمپ کا کہنا تھا کہ امریکا دنیا کی مضبوط ترین فوج اور جدید آلات رکھتا ہے۔ انہوں نے B2 طیاروں کے پائلٹس سے ملاقات کو متاثر کن قرار دیتے ہوئے کہا کہ “یہ بالکل ٹام کروز جیسے بہادر اور ماہر پائلٹس ہیں۔”