ماسکو: پاکستان کی نامور اداکارہ سونیا حسین نے روس کے دارالحکومت ماسکو میں منعقدہ ’’یوریشین اوپن ایوارڈ ڈائمنڈ بٹر فلائی‘‘ کی تقریب میں شاندار کامیابی حاصل کرتے ہوئے ’’بیسٹ سپورٹنگ ایکٹریس‘‘ کا عالمی ایوارڈ جیت لیا۔ یہ اعزاز انہیں اپنی فلم ’’دیمک‘‘ میں بہترین اداکاری کے اعتراف میں دیا گیا۔
ایوارڈ تقریب میں دنیا کے 17 ممالک کی 34 فلمیں شامل تھیں، جن میں پاکستان کی دو فلمیں ’’دیمک‘‘ اور ’’لوو گرو‘‘ بھی مقابلے میں شامل تھیں۔ فلم ’’دیمک‘‘ نے بین الاقوامی ججوں کی خصوصی توجہ حاصل کی، جبکہ سونیا حسین کی اداکاری کو جذباتی اثر، کردار کی گہرائی اور حقیقت سے قریب تر انداز کے باعث بھرپور سراہا گیا۔
سونیا حسین نے انسٹاگرام پر تقریب کی تصاویر اور ویڈیوز شیئر کرتے ہوئے اپنی خوشی کا اظہار کیا، جس کے بعد پاکستان سمیت دنیا بھر سے مداحوں کی جانب سے مبارکبادوں کا سلسلہ جاری ہے۔
ایوارڈ منتظمین کے مطابق اس سال تقریب میں عالمی شرکت گزشتہ برسوں کی نسبت زیادہ رہی، اور پاکستانی فلموں کی بڑھتی ہوئی موجودگی جنوبی ایشیائی سینما کی عالمی سطح پر مضبوط ہوتی ہوئی شناخت کی علامت ہے۔
