اسلام آباد: پاکستان اور مصر نے سیاسی، دفاعی اور معاشی تعاون کو مزید مضبوط بنانے پر اتفاق کرتے ہوئے دہشت گردی کے خاتمے کے لیے ہر ممکن تعاون کا اعلان کیا ہے۔ اسلام آباد میں نائب وزیراعظم و وزیر خارجہ اسحاق ڈار اور مصری وزیر خارجہ ڈاکٹر بدر احمد محمد عبدالعاطی نے مشترکہ پریس کانفرنس کی۔
اسحاق ڈار نے مصری ہم منصب کو پاکستان آمد پر خوش آمدید کہتے ہوئے کہا کہ دورے کا مقصد دوطرفہ تعلقات کو نئی بلندیوں تک لے جانا ہے۔ ان کے مطابق دونوں ممالک نے سیاسی ڈائیلاگ، معاشی شراکت داری اور دفاعی تعاون میں اضافہ کرنے پر اتفاق کیا ہے۔ پاکستان جلد مصر کے ساتھ 250 بزنس ہاؤسز کی فہرست شیئر کرے گا جبکہ آئندہ چھ ماہ میں مزید 250 بزنس ادارے شامل کیے جائیں گے۔ دونوں ملکوں پر مشتمل بزنس فورم تشکیل دینے اور اس کا پہلا اجلاس مصر میں منعقد کرنے کا فیصلہ بھی ہوا ہے۔
وزیر خارجہ نے بتایا کہ ملاقات میں غزہ، کشمیر، افغانستان اور دیگر علاقائی و عالمی امور پر بھی تبادلہ خیال ہوا۔ مصر نے پاکستانی طلبہ کے لیے الاظہر یونیورسٹی میں اسکالر شپس دگنی کرنے کا اعلان بھی کیا ہے، جسے پاکستان نے سراہا۔
مصری وزیر خارجہ ڈاکٹر بدر احمد محمد عبدالعاطی نے پاکستان میں دہشت گردی کے حالیہ واقعات کی مذمت کرتے ہوئے جاں بحق افراد کے لواحقین سے تعزیت کا اظہار کیا۔ انہوں نے کہا کہ مصر دہشت گردی اور شدت پسندی کے خلاف جنگ میں پاکستان کے ساتھ کھڑا ہے اور دونوں ممالک سیکورٹی سمیت تمام شعبوں میں تعاون بڑھائیں گے۔
ان کا کہنا تھا کہ مصر اور پاکستان کے تعلقات باہمی احترام اور مشترکہ مفادات پر مبنی ہیں، اور زراعت، لائیوسٹاک، ادویہ سازی، سرمایہ کاری اور تجارت کے شعبوں میں تعاون بڑھانے کے لیے اقدامات جاری رہیں گے۔
مصری وزیر خارجہ نے کہا کہ پاکستان نے غزہ جنگ بندی میں اہم کردار ادا کیا، اور مصر غزہ کی تعمیر نو میں بھی پاکستان کے تعاون کا خواہاں ہے۔ انہوں نے اس بات پر زور دیا کہ فلسطین کا مسئلہ اقوام متحدہ کی قراردادوں اور دو ریاستی حل کے تحت ہی پائیدار طور پر حل ہو سکتا ہے۔
قبل ازیں ڈاکٹر بدر احمد محمد عبدالعاطی وزارتِ خارجہ پہنچے جہاں اسحاق ڈار نے ان کا استقبال کیا اور دونوں رہنماؤں نے گرمجوشی سے مصافحہ کیا۔ بعد ازاں وفود کی سطح پر ملاقات میں معیشت، دفاع، تجارت، سیکورٹی اور دیگر شعبوں میں تعاون بڑھانے پر اتفاق کیا گیا۔
اسحاق ڈار نے کہا کہ پاکستان اور مصر کے درمیان دیرینہ برادرانہ تعلقات مزید مضبوط ہو رہے ہیں اور یہ دورہ مشترکہ اہداف کے حصول میں معاون ثابت ہوگا۔
