واشنگٹن: عالمی شہرت یافتہ پاپ سٹار ٹیلر سوئفٹ اپنی شادی سے قبل قریبی دوستوں کے ساتھ خصوصی سیر و تفریح کی تیاریوں میں مصروف ہو گئی ہیں۔ امریکی میڈیا کے مطابق ٹیلر اور ان کی سہیلیاں کم از کم تین سے چار بیچلوریٹ ٹرپس پلان کر رہی ہیں، جن کے لیے نیویارک، نیشویل، اٹلی اور بہاماز جیسے پسندیدہ مقامات کا انتخاب کیا گیا ہے۔
رپورٹس کے مطابق ان تقریبات کا مقصد شادی سے پہلے کے لمحات کو خوشگوار، پُرسکون اور یادگار بنانا ہے۔ ٹیلر اور ان کی دوستیں ویک اینڈز اکٹھے گزاریں گی، تفریح کریں گی اور خوبصورت مقامات پر بیٹھ کر شادی کی پلاننگ بھی کریں گی۔
بیچلوریٹ تقریبات کی میزبانی خود ٹیلر سوئفٹ کریں گی، اور ان کی ممکنہ برائیڈل پارٹی میں سیلینا گومز، جی جی حدید کے ساتھ ساتھ فٹبالر ٹریوس کیلسی کی والدہ ڈونا کیلسی بھی شامل ہوں گی۔ میڈیا رپورٹس کے مطابق گزشتہ دو ہفتوں سے یہ تمام لوگ فون کالز، میسجز، فیس ٹائم اور زوم کے ذریعے رابطے میں ہیں تاکہ شادی کو منفرد اور یادگار بنایا جا سکے۔
یاد رہے کہ ٹیلر سوئفٹ اور امریکی فٹبالر ٹریوس کیلسی کی منگنی رواں سال اگست میں ہوئی تھی اور دونوں گزشتہ دو سال سے ایک دوسرے کے ساتھ ہیں۔
