اسلام آباد: پاکستان میں افغان شہریوں کے ذریعے دہشت گردی پھیلانے کے ایک منظم نیٹ ورک کا انکشاف ہوا ہے۔ تلہ گنگ سے گرفتار افغان شہری قاسم عرف حسن کے اعترافی بیان نے اس نیٹ ورک کی تفصیلات عوام کے سامنے رکھ دی ہیں۔
قاسم عرف حسن نے بتایا کہ وہ افغانستان کے گردیزولایت کا رہنے والا ہے اور 10 سال قبل اپنے خاندان کے ساتھ لکی مروت پاکستان منتقل ہوا۔ گرفتار دہشت گرد نے اعتراف کیا کہ 2025 میں اس کی طالبان کمانڈر ارمانی سے ملاقات ہوئی، جس کے بعد وہ جہاد کی کارروائیوں میں شامل ہوا۔
قاسم نے مزید بتایا کہ کمانڈر ارمانی نے انہیں اور ان کے ساتھی فاروق کو فوجی قلعے پر فدائی حملہ کے لیے ریکی کروائی، لیکن موقع نہ ملنے کی وجہ سے حملہ ممکن نہیں ہو سکا۔ بعد میں اس نے تنظیم کے لیے نئے افراد بھرتی کیے اور پانچ افراد کی بھرتی پر فی شخص 10 ہزار روپے وصول کیے۔
گرفتار افغان شہری کے مطابق، ستمبر میں وہ پنجاب آیا تاکہ وہاں مزید افراد کو تنظیم میں شامل کیا جا سکے، تاہم کچھ دن بعد اسے پولیس نے گرفتار کر لیا۔ اس کی اعترافی ویڈیو پاکستان میں دہشت گردی کے لیے افغان سرزمین کے استعمال کا واضح ثبوت پیش کرتی ہے۔
پاکستان پہلے بھی عالمی سطح پر دہشت گردی کے لیے افغان سرزمین کے استعمال کے متعدد ناقابل تردید شواہد پیش کر چکا ہے۔
