اسلام آباد: وزیراعظم محمد شہباز شریف کی زیر صدارت نجی شعبے کے ماہرین اور کاروباری شخصیات پر مبنی ٹیکس اصلاحات ورکنگ گروپ کا اجلاس منعقد ہوا۔ اجلاس کا مقصد ملک میں کاروبار کو مضبوط اور مسابقتی بنانے کے ساتھ ساتھ برآمدات میں اضافے پر مبنی معاشی ترقی کے لیے عملی اقدامات طے کرنا تھا۔
وزیراعظم نے کہا کہ حکومت ٹیکس دینے والے کاروباری حضرات اور کمپنیوں کو قدر کی نگاہ سے دیکھتی ہے اور کاروبار کی ترقی سے ہی ٹیکس آمدن میں اضافہ ممکن ہے۔ انہوں نے مزید کہا کہ نجی شعبے کی جانب سے دی گئی تجاویز قابل قدر ہیں، جن پر غور کے بعد وزیر خزانہ کی سربراہی میں کمیٹی قائم کی جا رہی ہے، جو عملی اقدامات پر مبنی لائحہ عمل پیش کرے گی۔
اجلاس میں شریک کاروباری شخصیات اور سرمایہ کاروں نے ایکسپورٹ ڈویلپمنٹ سرچارج ختم کرنے پر وزیراعظم کا شکریہ ادا کیا۔ اجلاس میں وفاقی وزراء احد خان چیمہ، محمد اورنگزیب، علی پرویز ملک، وزیر مملکت بلال اظہر کیانی، معاون خصوصی ہارون اختر اور دیگر اعلیٰ حکام نے بھی شرکت کی۔
اجلاس میں کارپوریٹ شعبے سمیت مختلف شعبوں میں ٹیکس کی شرح، نجی شعبے کی ترقی، برآمدات اور سرمایہ کاری میں اضافے کے لیے تجاویز پیش کی گئیں۔ شرکا کو خطے میں پاکستانی کاروباری شعبے کی مسابقت بڑھانے کے حوالے سے بھی مفید مشورے دیے گئے۔
