دبئی: انڈر 19 ایشیا کرکٹ کپ کے پانچویں میچ میں بھارت کی انڈر 19 ٹیم پاکستان کے خلاف 240 رنز بنا کر آؤٹ ہو گئی، جس کے بعد پاکستان کو میچ جیتنے کے لیے 241 رنز کا ہدف ملا ہے۔
آئی سی سی کرکٹ اکیڈمی دبئی میں کھیلے جا رہے اس میچ میں قومی انڈر 19 ٹیم کے کپتان فرحان یوسف نے ٹاس جیت کر پہلے فیلڈنگ کا فیصلہ کیا۔ بارش کے باعث ٹاس تاخیر سے ہوا اور میچ کو 49 اوورز فی اننگز تک محدود کر دیا گیا۔
بھارتی ٹیم کی جانب سے آرون جارج نے شاندار بیٹنگ کرتے ہوئے 85 رنز بنائے، جبکہ کنشک چوہان 46 اور آیوش مہاترے 38 رنز بنا سکے۔ دیگر کھلاڑیوں میں ابھیگیان کنڈو 22، ویہان ملہوترا 12، ہینل پٹیل 12، ویبھو سوریاونشی 5، کھیلان پٹیل 6 اور ویڈانت ترویدی 7 رنز بنا کر آؤٹ ہوئے۔
پاکستان کی جانب سے محمد صیام نے شاندار بولنگ کا مظاہرہ کرتے ہوئے 3 وکٹیں حاصل کیں، جبکہ عبدالسبحان اور نقاب شفیق نے 2،2 کھلاڑیوں کو پویلین کی راہ دکھائی۔
ٹاس کے بعد گفتگو کرتے ہوئے کپتان فرحان یوسف نے کہا کہ بھارت کے خلاف میچ کا کوئی دباؤ نہیں، یہ ہمارے لیے ایک معمول کا میچ ہے۔ انہوں نے کہا کہ تمام کھلاڑی پراعتماد ہیں اور ٹیم میں ایک تبدیلی کی گئی ہے، دانیال کی جگہ محمد سبحان کو شامل کیا گیا ہے۔
واضح رہے کہ پاکستان نے اپنے پہلے میچ میں ملائیشیا کو شکست دی تھی، جبکہ بھارت نے اپنے ابتدائی میچ میں یو اے ای کو ہرایا تھا۔
