نئی دہلی: بھارت کے سابق آرمی چیف جنرل (ر) وید پرکاش ملک نے عسکری ٹیکنالوجی کے میدان میں پاکستان کی برتری کو تسلیم کرتے ہوئے کہا ہے کہ جدید جنگی صلاحیتوں نے دونوں ممالک کی دفاعی حکمتِ عملی کو یکسر بدل دیا ہے۔
جنرل وید پرکاش ملک نے کہا کہ آپریشن سندور کے دوران پاکستان اور بھارت میں سے کسی نے بھی ایک دوسرے کی سرحد عبور نہیں کی، کیونکہ دونوں ممالک کے پاس جدید سٹینڈ آف ویپنز موجود ہیں، جن کی مدد سے دور بیٹھ کر کارروائی ممکن ہو چکی ہے۔
انہوں نے مزید کہا کہ اگرچہ دونوں ممالک نے ٹیکنالوجی کے شعبے میں پیش رفت کی ہے، پاکستان کے پاس بھارت کے مقابلے میں بہتر ہتھیار اور جدید سازوسامان موجود ہے۔ انہوں نے رافیل طیاروں اور ایس-400 دفاعی نظام کی تباہی کو پاکستان کی عسکری برتری کی مثال قرار دیا۔
جنرل (ر) ملک نے بھارت کے لیے انتباہ جاری کرتے ہوئے کہا کہ اپنی فوجی تیاریوں، سازوسامان اور ٹیکنالوجی میں مزید بہتری لانا وقت کی ضرورت ہے تاکہ مستقبل میں کسی بھی ممکنہ کارروائی کا مؤثر جواب دیا جا سکے۔ ان کا کہنا تھا کہ جدید جنگیں اب روایتی انداز سے ہٹ کر ٹیکنالوجی اور اسٹینڈ آف ویپنز پر منحصر ہو گئی ہیں، جس میں بہتری وقت کی اہم ضرورت ہے۔
