دبئی: انڈر 19 ایشیا کرکٹ کپ کے پانچویں میچ میں بھارت نے پاکستان کو 90 رنز سے شکست دے دی۔ 241 رنز کے ہدف کے تعاقب میں قومی انڈر 19 ٹیم 42ویں اوور میں 150 رنز بنا کر آؤٹ ہو گئی۔
پاکستان کی جانب سے حذیفہ احسن 70 رنز کے ساتھ نمایاں رہے، جبکہ کپتان فرحان یوسف نے 23 اور عثمان خان نے 16 رنز اسکور کیے۔ ان کے علاوہ کوئی بھی بلے باز ڈبل فگر میں داخل نہ ہو سکا، جس کے باعث ٹیم ہدف کے حصول میں ناکام رہی۔
اس سے قبل آئی سی سی کرکٹ اکیڈمی دبئی میں کھیلے گئے میچ میں قومی ٹیم کے کپتان نے ٹاس جیت کر پہلے فیلڈنگ کا فیصلہ کیا۔ بھارتی ٹیم نے پہلے بیٹنگ کرتے ہوئے 41.1 اوورز میں 10 وکٹوں کے نقصان پر 240 رنز بنائے۔
بھارت کی جانب سے آرون جارج نے شاندار 85 رنز کی اننگز کھیلی جبکہ کنشک چوہان 46 رنز بنا کر نمایاں رہے۔ دیگر کھلاڑیوں میں آیوش مہاترے 38، ابھیگیان کنڈو 22، ویہان ملہوترا 12، ہینل پٹیل 12، کھیلان پٹیل 6، ویبھو سوریاونشی 5، ویڈانت ترویدی 7 اور دیپیش دیویندرن 1 رن بنا کر آؤٹ ہوئے۔
پاکستان کی طرف سے محمد صیام اور عبدالسبحان نے تین، تین وکٹیں حاصل کیں، جبکہ نقاب شفیق نے دو اور علی رضا اور احمد حسین نے ایک ایک کھلاڑی کو آؤٹ کیا۔
واضح رہے کہ بارش کے باعث ٹاس تاخیر سے ہوا اور میچ کو 49 اوورز فی اننگز تک محدود کر دیا گیا تھا۔
