ژوب میں نیشنل ہائی وے پر کوئلے سے بھرے ٹرک اور ایک آئل ٹینکر میں اچانک آگ بھڑک اٹھی، جس کے نتیجے میں 16 افراد زخمی ہو گئے۔ واقعے کے بعد علاقے میں شدید خوف و ہراس پھیل گیا جبکہ ہائی وے پر ٹریفک بھی متاثر رہی۔
ریسکیو حکام کے مطابق زخمی ہونے والوں میں فائر بریگیڈ کا عملہ، ٹرک اور ٹینکر کے ڈرائیورز کے علاوہ پولیس اہلکار بھی شامل ہیں۔ آگ لگنے کی اطلاع ملتے ہی ریسکیو، فائر بریگیڈ اور پولیس کی ٹیمیں فوری طور پر موقع پر پہنچ گئیں اور آگ پر قابو پانے کی کوششیں شروع کیں۔
پولیس کا کہنا ہے کہ گڈز ٹرانسپورٹرز کی جانب سے ٹرک اور آئل ٹینکر سڑک کے کنارے کھڑے کیے گئے تھے کہ اسی دوران اچانک آگ بھڑک اٹھی، جس نے دیکھتے ہی دیکھتے شدت اختیار کر لی۔ فائر بریگیڈ کے عملے نے کافی جدوجہد کے بعد آگ پر قابو پایا۔
ریسکیو حکام کے مطابق زخمی ہونے والے 6 افراد کی حالت تشویشناک ہونے کے باعث انہیں کوئٹہ منتقل کر دیا گیا ہے، جبکہ دیگر زخمیوں کو مقامی ہسپتال میں طبی امداد فراہم کی جا رہی ہے۔
پولیس کے مطابق آگ لگنے کی وجوہات تاحال معلوم نہیں ہو سکیں، تاہم واقعے کی مکمل تحقیقات شروع کر دی گئی ہیں۔
