پاکستان میں حکومت اور گڈز ٹرانسپورٹرز کے درمیان جاری مذاکرات کامیاب ہو گئے ہیں، جس کے بعد ملک بھر کے ٹرانسپورٹرز نے اپنی ہڑتال ختم کرنے کا اعلان کر دیا ہے۔ ہڑتال کے خاتمے سے ترسیل و نقل و حمل کے نظام کی بحالی شروع ہو گئی ہے۔
گڈز ٹرانسپورٹرز ایسوسی ایشن کے صدر ملک شہزاد نے گلبائی ٹرک اڈے پر پریس کانفرنس کرتے ہوئے کہا کہ حکومت کی جانب سے کیے گئے وعدوں کی بنیاد پر ہڑتال ختم کی جا رہی ہے، جبکہ ٹرانسپورٹرز کے تمام اہم مطالبات منظور کر لیے گئے ہیں۔ ان کا کہنا تھا کہ حکومتی یقین دہانیوں کے بعد ٹرانسپورٹرز نے معمولات بحال کرنے کا فیصلہ کیا ہے۔
ملک شہزاد نے بتایا کہ ملک بھر میں تقریباً 10 روز تک جاری رہنے والی ہڑتال کے باعث صنعتوں کو خام مال کی فراہمی معطل رہی، جس سے کاروباری سرگرمیاں شدید متاثر ہوئیں۔ انہوں نے کہا کہ حکومت نے مختلف امور پر لچک کا مظاہرہ کیا اور متعلقہ نوٹیفکیشن جاری ہوتے ہی ہڑتال ختم کر دی گئی۔
دوسری جانب ہڑتال کے خاتمے پر صنعتی حلقوں نے اطمینان کا اظہار کیا ہے۔ ٹرانسپورٹ کی بحالی کے بعد صنعتوں نے دوبارہ کام کا آغاز کرنا شروع کر دیا ہے، جس سے معیشت کو سہارا ملنے کی امید ہے۔
آئرن مرچنٹس ایسوسی ایشن کے صدر حماد پوناوالا نے کہا کہ ہڑتال کے دوران خام مال کی کمی کے باعث کئی صنعتیں بند ہونے کے قریب تھیں، جبکہ لوہے کے تاجروں سمیت دیگر تجارتی شعبوں کو اربوں روپے کے نقصان کا سامنا تھا۔ انہوں نے ہڑتال کے خاتمے کو کاروباری طبقے کے لیے خوش آئند قرار دیا۔
