صدرِ مملکت آصف علی زرداری نے کہا ہے کہ پاکستان قطر کے ساتھ سرمایہ کاری اور تجارت کے شعبوں میں تعاون کو مزید فروغ دینا چاہتا ہے۔ انہوں نے توانائی، زراعت اور ٹیکنالوجی سمیت مختلف شعبوں میں شراکت داری بڑھانے کی خواہش کا اظہار کیا ہے۔
صدرِ پاکستان نے ریاستِ قطر کے قومی دن کے موقع پر اپنے پیغام میں امیرِ قطر شیخ تمیم بن حمد الثانی اور قطری عوام کو مبارکباد پیش کی اور نیک تمناؤں کا اظہار کیا۔ ان کا کہنا تھا کہ پاکستان اور قطر کے تعلقات مشترکہ اقدار، باہمی احترام اور برادرانہ روابط پر قائم ہیں، جو وقت کے ساتھ مزید مضبوط ہوئے ہیں۔
آصف علی زرداری نے کہا کہ امیرِ قطر کی قیادت میں قطر نے نمایاں ترقی اور کامیابیاں حاصل کیں اور خطے و عالمی سطح پر قطر کا مثبت کردار قابلِ تحسین ہے۔ انہوں نے کہا کہ افرادی قوت اور عوامی روابط دونوں ممالک کے تعلقات کی مضبوط بنیاد ہیں، جبکہ پاکستان قطر کے ساتھ دوطرفہ دوستی کو مزید وسعت دینے کے لیے پرعزم ہے۔
دوسری جانب صدرِ مملکت آصف علی زرداری نے عالمی یومِ کسان کے موقع پر پاکستان کے کسانوں کو خراجِ تحسین پیش کیا ہے۔ اپنے بیان میں انہوں نے کہا کہ پاکستانی کسان ملکی معیشت، غذائی خودکفالت اور دیہی ترقی کی ریڑھ کی ہڈی ہیں۔
صدر مملکت نے کہا کہ چونکہ وہ خود ایک زرعی پس منظر رکھنے والے گھرانے سے تعلق رکھتے ہیں، اس لیے کسانوں کی محنت، کامیابیوں اور مشکلات سے بخوبی آگاہ ہیں۔ ان کے مطابق زراعت کروڑوں پاکستانی خاندانوں کے روزگار کا ذریعہ اور قومی ترقی کا اہم ستون ہے۔
آصف علی زرداری نے کہا کہ پانی کی قلت، موسمیاتی تبدیلی اور زرعی لاگت میں اضافہ کسانوں کو درپیش بڑے چیلنجز ہیں۔ انہوں نے زور دیا کہ کسانوں کی فلاح، جدید زرعی ٹیکنالوجی کے فروغ اور منڈیوں تک بہتر رسائی کے لیے ٹھوس اقدامات ناگزیر ہیں۔ زرعی شعبے کی مضبوطی سے ہی ملک میں غذائی تحفظ، پائیدار ترقی اور خوشحالی ممکن ہے۔
