اسلام آباد: انسدادِ دہشت گردی عدالت کے احکامات پر وزیر اعلیٰ خیبرپختونخوا سہیل آفریدی سمیت دیگر ملزمان کے خلاف اشتہاری کارروائی کا آغاز کر دیا گیا ہے۔ عدالت کے حکم پر مختلف مقامات پر طلبی کے نوٹسز چسپاں کر دیے گئے ہیں۔
ذرائع کے مطابق جوڈیشل کمپلیکس اسلام آباد میں بھی نمایاں مقامات پر نوٹسز آویزاں کیے گئے ہیں، جن میں سہیل آفریدی، مینا خان، امجد خان، شفیع اللہ جان اور امجد آفریدی کو عدالت میں پیش ہونے کی ہدایت کی گئی ہے۔
انسدادِ دہشت گردی عدالت کی جانب سے یہ کارروائی سیکشن 87 کے تحت عمل میں لائی گئی ہے۔ نوٹسز میں کہا گیا ہے کہ ملزمان عدالتی احکامات کی تعمیل نہیں کر رہے یا روپوش ہیں، جس کے باعث یہ اقدام اٹھایا گیا۔
عدالتی نوٹسز کے مطابق تمام ملزمان کو عدالت میں پیش ہونے کا آخری موقع دیا جا رہا ہے۔ اگر مقررہ وقت میں پیشی نہ ہوئی تو قانون کے مطابق مزید سخت کارروائی عمل میں لائی جائے گی۔
