اسلام آباد: صدرِ مملکت آصف علی زرداری نے وزیرِ اعظم کے مشورے پر اسلام آباد ہائیکورٹ کے جج جسٹس طارق محمود جہانگیری کا ڈی نوٹیفکیشن منظور کر لیا ہے۔
صدرِ مملکت نے یہ منظوری اسلام آباد ہائیکورٹ کے فیصلے کی روشنی میں دی، جس میں جسٹس طارق محمود جہانگیری کی بطور جج تعیناتی کو غیر قانونی قرار دیا گیا تھا۔ وزارت قانون و انصاف نے معزول جج کو باضابطہ طور پر ڈی نوٹیفائی کر دیا ہے۔
واضح رہے کہ اسلام آباد ہائیکورٹ نے ڈگری کیس کے فیصلے میں جسٹس طارق جہانگیری کی تعیناتی کالعدم قرار دیتے ہوئے انہیں جج کے عہدے سے ہٹانے کا حکم دیا تھا۔ چیف جسٹس سردار محمد سرفراز ڈوگر اور جسٹس محمد اعظم خان پر مشتمل ڈویژن بنچ نے کہا تھا کہ جسٹس طارق محمود جہانگیری ایڈیشنل اور بعدازاں مستقل جج بننے کے وقت قانونی طور پر قابل قبول ایل ایل بی کی ڈگری کے حامل نہیں تھے۔
