دہشت گردی سے نمٹنے اور سیکیورٹی نظام کو مزید مؤثر بنانے کے لیے خیبرپختونخوا پولیس نے جدید اسلحہ اور ٹیکنالوجی کی خریداری کا فیصلہ کر لیا ہے۔ اس حوالے سے سامنے آنے والی دستاویزات میں پولیس فورس کی استعداد کار بڑھانے کے لیے مختلف اقدامات کی تفصیلات شامل ہیں۔
دستاویز کے مطابق پولیس کے لیے 50 بیریٹا سنائپر رائفلز، 100 دیگر سنائپر رائفلز اور 1250 جدید خودکار ہتھیار ٹی ڈبلیو ایس خریدے جائیں گے۔ اس کے علاوہ نگرانی کے نظام کو مضبوط بنانے کے لیے 430 تھرمل بائنیکیولرز بھی حاصل کیے جائیں گے۔
مزید بتایا گیا ہے کہ خیبرپختونخوا پولیس کو 73 سرویلنس ڈرون فراہم کیے جائیں گے جبکہ 330 تھرمل ٹی آئی کیمرے بھی خریدے جائیں گے۔ فضائی خطرات سے نمٹنے کے لیے 14 اضافی اینٹی ڈرون گنز شاملِ فہرست ہیں، جبکہ سرچ آپریشنز کے لیے 4 خصوصی سرچنگ ڈرونز بھی حاصل کیے جائیں گے۔
دہشت گردی کے خلاف کارروائیوں کو محفوظ بنانے کے لیے 20 جدید بم ڈسپوزل سوٹس خریدنے کا فیصلہ کیا گیا ہے۔ اس کے ساتھ ساتھ سرچ آپریشنز میں استعمال کے لیے ایک ہزار اسپارٹا کیمرے، 6 ہزار بلٹ پروف جیکٹس اور 6 ہزار بلٹ پروف ہیلمٹس بھی فراہم کیے جائیں گے۔
دستاویز کے مطابق پولیس کی گاڑیوں کی سیکیورٹی کو بہتر بنانے کے لیے 39 گاڑیوں کی فرنٹ اسکرین اور 5 ڈبل کیبن گاڑیوں کی بلٹ پروفنگ کی جائے گی۔ اس کے علاوہ 210 بی سیون لیول بکتر بند گاڑیاں اور 1200 آپریشنل بکتر بند گاڑیاں بھی خریدی جائیں گی، جبکہ موجودہ گاڑیوں کی سائیڈ آرمَرنگ اور باڈی فیبریکیشن کا کام بھی شامل ہے۔
حکام کے مطابق ان اقدامات کا مقصد دہشت گردی کے خطرات سے مؤثر انداز میں نمٹنا اور پولیس اہلکاروں کی جان و مال کا تحفظ یقینی بنانا ہے۔
