لاہور: پاکستان کرکٹ بورڈ (پی سی بی) نے سری لنکا کے خلاف ٹی ٹوئنٹی انٹرنیشنل سیریز کے لیے 15 رکنی قومی اسکواڈ کا اعلان کر دیا ہے۔ پی سی بی کے مطابق سلمان علی آغا سری لنکا میں پاکستان ٹی 20 ٹیم کی قیادت کریں گے۔
اعلان کردہ اسکواڈ میں وکٹ کیپر بلے باز خواجہ محمد نافع کو پہلی مرتبہ ٹی 20 ٹیم میں شامل کیا گیا ہے، جبکہ شاداب خان نے کندھے کی سرجری کے بعد ٹی 20 اسکواڈ میں واپسی کی ہے۔ ٹیم میں تجربہ کار اور نوجوان کھلاڑیوں کا امتزاج رکھا گیا ہے۔
پاکستان کے 15 رکنی ٹی 20 اسکواڈ میں سلمان علی آغا، عبدالصمد، ابرار احمد، فہیم اشرف، فخر زمان، خواجہ محمد نافع، محمد نواز، محمد سلمان مرزا، محمد وسیم جونیئر، نسیم شاہ، صاحبزادہ فرحان، صائم ایوب، شاداب خان، عثمان خان اور عثمان طارق شامل ہیں۔
پاکستان کرکٹ ٹیم 4 اور 5 جنوری 2026 کو مرحلہ وار سری لنکا روانہ ہوگی۔ دونوں ٹیموں کے درمیان تین ٹی 20 انٹرنیشنل میچز کھیلے جائیں گے، جو 7، 9 اور 11 جنوری کو دمبولا میں منعقد ہوں گے۔ پی سی بی کے مطابق یہ سیریز آئندہ ٹی 20 ورلڈ کپ کے لیے اسکواڈ کے انتخاب میں اہم کردار ادا کرے گی۔
ادھر پی سی بی نے سیریز کے لیے ٹیم مینجمنٹ کا بھی اعلان کر دیا ہے۔ نوید اکرم چیمہ ٹیم منیجر ہوں گے، مائیک ہیسن وائٹ بال کے ہیڈ کوچ، ایشلے نوفکی باؤلنگ کوچ، محمد حنیف ملک بیٹنگ کوچ اور شین مکڈرموٹ فیلڈنگ کوچ کی ذمہ داریاں سنبھالیں گے۔
اس کے علاوہ کلف ڈیکن فزیوتھراپسٹ، گرانٹ لوڈن اسٹرینتھ اینڈ کنڈیشننگ کوچ، طلحہ اعجاز ٹیم اینالسٹ اور سید نعیم احمد میڈیا منیجر ہوں گے۔ سکیورٹی کی ذمہ داری کرنل عثمان انوری کے پاس ہوگی، جبکہ ڈاکٹر واجد علی رفائی ٹیم ڈاکٹر اور محمد احسان مسیور ہوں گے۔
