مظفرآباد: وزیراعظم شہباز شریف نے مظفرآباد میں جدید کینسر ہسپتال اور میڈیکل کالج کا افتتاح کر دیا۔ اس موقع پر کشمیر انسٹیٹیوٹ آف نیوکلیئر میڈیسن، آنکالوجی اینڈ ریڈیو تھراپی کی افتتاحی تقریب منعقد ہوئی جس سے وزیراعظم نے خطاب کیا۔
وزیراعظم شہباز شریف نے کہا کہ انسانیت کی خدمت سے بڑھ کر کوئی کام نہیں، اور کینسر جیسے موذی مرض میں مبتلا مریضوں کا علاج ایک عظیم خدمت ہے۔ انہوں نے کہا کہ اس جدید ہسپتال کے قیام سے آزاد کشمیر کے عوام کو مقامی سطح پر معیاری طبی سہولیات میسر آئیں گی۔
وزیراعظم نے اپنے ذاتی تجربے کا حوالہ دیتے ہوئے بتایا کہ وہ خود بھی کینسر کے مرض کا سامنا کر چکے ہیں، اس لیے انہیں بخوبی احساس ہے کہ محدود وسائل رکھنے والے افراد کے لیے کینسر کا علاج کتنا مشکل ہوتا ہے۔ ان کا کہنا تھا کہ ایسے ادارے عوام کے لیے امید کی کرن ثابت ہوتے ہیں۔
تقریب سے بین الاقوامی ایٹمی توانائی ایجنسی کے ڈائریکٹر جنرل رافیل ماریانو گروسی نے ویڈیو پیغام کے ذریعے خطاب کیا۔ انہوں نے آزاد کشمیر میں کینسر ہسپتال کے قیام کو ایک اہم سنگ میل قرار دیتے ہوئے عوامی فلاح کے لیے ایٹمی توانائی کے مثبت استعمال کو سراہا۔
بعد ازاں وزیراعظم نے ہسپتال کے مختلف شعبوں کا دورہ کیا، جہاں حکام نے انہیں فراہم کی جانے والی طبی سہولیات اور جدید آلات کے بارے میں تفصیلی بریفنگ دی۔
