لاہور: ملک کے مختلف حصوں میں بارش اور برفباری کی پیشگوئی کے پیش نظر متعلقہ اداروں نے الرٹ جاری کر دیا ہے، جبکہ پہاڑی علاقوں میں لینڈ سلائیڈنگ کے خدشے کے باعث شہریوں کو احتیاط برتنے کی ہدایت کی گئی ہے۔
محکمہ موسمیات کے مطابق خیبرپختونخوا اور بلوچستان میں آج سے یکم جنوری تک بارشوں کا امکان ہے، جبکہ پنجاب کے مختلف علاقوں میں آج سے 2 جنوری تک بارش متوقع ہے۔ لاہور، گجرات، گوجرانوالہ، فیصل آباد اور دیگر شہروں میں بادل برسنے کا امکان ظاہر کیا گیا ہے۔
کراچی میں بھی موسم سرما کی پہلی بارش 30 دسمبر کو ہونے کا امکان ہے، جس سے سردی کی شدت میں اضافہ ہو سکتا ہے۔
پی ڈی ایم اے کے مطابق آج رات سے یکم جنوری کے دوران کوئٹہ، زیارت، چمن، پشین اور قلعہ عبداللہ میں بارش متوقع ہے، جبکہ قلعہ سیف اللہ، نوشکی، چاغی، ہرنائی، بارکھان، سبی اور لورالائی میں بھی بارش کا امکان ہے۔
پی ڈی ایم اے نے بتایا کہ موسیٰ خیل، دکی، گوادر، حب، لسبیلہ، کیچ، آواران اور پنجگور میں بارش ہو سکتی ہے، جبکہ خضدار، قلات، مستونگ، کچھی اور واشک میں بھی بارش کی پیشگوئی کی گئی ہے۔ خاران، سوراب، ژوب اور شیرانی میں بھی بارش متوقع ہے۔
ادارے کے مطابق اس دوران کوئٹہ، زیارت، قلات، پشین اور شمالی اضلاع کے پہاڑی علاقوں میں برفباری کا بھی امکان ہے، جس کے باعث سردی کی شدت بڑھنے اور لینڈ سلائیڈنگ کے خدشات پیدا ہو سکتے ہیں۔ شہریوں اور مسافروں کو احتیاطی تدابیر اختیار کرنے کی ہدایت کی گئی ہے۔
