لاہور: موٹروے پولیس سنٹرل زون نے بڑی کارروائی کرتے ہوئے مضرِ صحت گوشت سپلائی کرنے والی وین کو پکڑ لیا اور غیر قانونی ترسیل ناکام بنا دی۔
ترجمان موٹروے پولیس سنٹرل ریجن کے مطابق قومی شاہراہ پر احمد پور ایسٹ کے قریب کارروائی کے دوران وین سے مردہ جانور کا گوشت برآمد ہوا۔ ترجمان نے بتایا کہ گوشت بغیر اجازت اور قانونی دستاویزات کے منتقل کیا جا رہا تھا، جو عوامی صحت کے لیے سنگین خطرہ تھا۔
موٹروے پولیس نے فوری طور پر پنجاب فوڈ اتھارٹی کو اطلاع دی، جس پر فوڈ اتھارٹی کی ٹیم نے موقع پر پہنچ کر گوشت کی جانچ کی۔ جانچ کے بعد برآمد شدہ مضرِ صحت گوشت کو موقع پر ہی تلف کر دیا گیا۔
ترجمان کے مطابق وین کے ڈرائیور کے خلاف قانونی کارروائی کرتے ہوئے بھاری جرمانہ بھی عائد کیا گیا۔ موٹروے پولیس کا کہنا ہے کہ عوامی صحت کے تحفظ کے لیے اس طرح کی کارروائیاں آئندہ بھی جاری رہیں گی۔
