اسلام آباد: وزیراعظم پاکستان شہباز شریف نے کہا ہے کہ بھارت کی جانب سے جاری جبر و تشدد کے تمام ہتھکنڈے کشمیری عوام کے حوصلے اور حقِ خودارادیت کی جدوجہد کو کمزور کرنے میں ناکام رہے ہیں۔
کشمیریوں کے یومِ حقِ خودارادیت کے موقع پر اپنے خصوصی پیغام میں وزیراعظم نے کہا کہ 5 جنوری 1949 کو اقوامِ متحدہ کی سلامتی کونسل کی قراردادوں کے ذریعے کشمیری عوام کے حقِ خودارادیت کو تسلیم کیا گیا۔ انہوں نے یاد دلایا کہ اسی دن اقوامِ متحدہ کے کمیشن برائے پاکستان و بھارت نے ایک تاریخی قرارداد منظور کی تھی۔
وزیراعظم شہباز شریف کا کہنا تھا کہ اس قرارداد کے تحت ریاست جموں و کشمیر کے مستقبل کا فیصلہ آزاد، منصفانہ اور غیر جانبدارانہ رائے شماری کے ذریعے ہونا تھا، مگر بھارت کے غیر قانونی قبضے کے باعث آج تک یہ وعدہ پورا نہ ہوسکا۔
انہوں نے مزید کہا کہ مقبوضہ جموں و کشمیر کے عوام گزشتہ کئی دہائیوں سے بھارتی قابض افواج کے مظالم اور انسانی حقوق کی سنگین خلاف ورزیوں کا سامنا کر رہے ہیں۔ وزیراعظم نے عالمی برادری پر زور دیا کہ وہ مقبوضہ کشمیر میں جاری جابرانہ اقدامات کا نوٹس لے اور کشمیری عوام کو ان کا جائز حق دلانے کے لیے مؤثر کردار ادا کرے۔
