کوئٹہ: بلوچستان کے علاقے چمن اور اس کے اطراف میں زلزلے کے جھٹکے محسوس کیے گئے جس کے باعث شہریوں میں خوف و ہراس پھیل گیا۔
زلزلہ پیما مرکز کے مطابق زلزلے کی شدت ریکٹر اسکیل پر 3.3 ریکارڈ کی گئی۔ زلزلے کا مرکز چمن سے تقریباً 7 کلومیٹر شمال مغرب میں واقع تھا جبکہ اس کی زیرِ زمین گہرائی 14 کلومیٹر بتائی گئی ہے۔
زلزلے کے جھٹکے محسوس ہوتے ہی شہری کلمہ طیبہ کا ورد کرتے ہوئے گھروں اور عمارتوں سے باہر نکل آئے۔ چند لمحوں کے لیے علاقے میں خوف کی فضا قائم رہی تاہم صورتحال جلد ہی معمول پر آ گئی۔
ابتدائی اطلاعات کے مطابق زلزلے کے باعث کسی قسم کے جانی یا مالی نقصان کی کوئی اطلاع موصول نہیں ہوئی، جبکہ متعلقہ ادارے صورتحال پر نظر رکھے ہوئے ہیں۔
