سری نگر: کشمیری عوام ہر سال 5 جنوری کو یومِ حقِ خودارادیت کے طور پر مناتے ہیں، تاکہ دنیا کو یاد دلایا جا سکے کہ اقوامِ متحدہ کی قراردادوں کے تحت انہیں اپنا مستقبل آزادانہ اور غیر جانبدارانہ طور پر منتخب کرنے کا حق حاصل ہے۔ یہ دن 5 جنوری 1949ء کو منظور ہونے والی اقوامِ متحدہ کی قرارداد کے تناظر میں منایا جاتا ہے، جسے اقوامِ متحدہ کے کمیشن برائے پاکستان و بھارت نے کشمیری عوام کے حق خودارادیت کے لیے منظور کیا تھا۔
ترجمان وزیراعظم آزاد جموں و کشمیر نے کہا ہے کہ بھارت نے مقبوضہ کشمیر میں کشمیری عوام پر عرصہ حیات تنگ کر کے انہیں بنیادی حقوق سے محروم کر رکھا ہے۔ ان کا کہنا تھا کہ بھارت کی مسلسل خلاف ورزیوں کے باوجود کشمیری عوام ہر سال اس دن کو تجدید عہد کے طور پر مناتے ہیں تاکہ عالمی برادری کو یہ پیغام دیا جا سکے کہ وہ کشمیر کے مسئلے پر اپنی ذمہ داریوں کو نظر انداز نہ کرے۔
کل جماعتی حریت کانفرنس کے رہنما کے مطابق یوم حق خودارادیت کے موقع پر آزاد جموں و کشمیر کے مختلف شہروں میں بھارت کے خلاف احتجاجی مظاہرے بھی کیے جاتے ہیں، جبکہ مظفرآباد میں اقوام متحدہ کے فوجی مبصر مشن کے دفتر میں یادداشت پیش کی جائے گی۔
واضح رہے کہ اقوام متحدہ کی قراردادیں کشمیری عوام کو یہ حق دیتی ہیں کہ وہ اپنی مرضی سے اپنا مستقبل خود منتخب کریں۔ رہنماوں کا کہنا ہے کہ اس وقت عالمی برادری کی ذمہ داری ہے کہ وہ اپنا مؤثر کردار ادا کرے تاکہ اقوام متحدہ کشمیری عوام سے کیے گئے وعدے پورے کر سکے۔
