سوشل میڈیا پر ایک بار پھر بالی وڈ اداکارہ انوشکا شرما کے شوہر اور بھارتی کرکٹر ویرات کوہلی کے ہم شکل ترک اداکار کی تصاویر وائرل ہو رہی ہیں۔
بھارتی میڈیا کے مطابق سماجی رابطوں کی ویب سائٹ ریڈ اِٹ پر ایک صارف نے ترکیہ کے مشہور تاریخی ڈرامے ارطغرل غازی کے اداکار جاوت جیتن گونر کی تصویر شیئر کی، جو حیرت انگیز طور پر ویرات کوہلی سے مشابہت رکھتے ہیں۔ صارف نے تصویر کے ساتھ مزاحیہ کیپشن لکھا: “انوشکا شرما کے شوہر کا ٹی وی شو ڈیبیو”۔ یہ پوسٹ تیزی سے وائرل ہوگئی اور دیگر سوشل میڈیا پلیٹ فارمز پر بھی شیئر کی جانے لگی۔
سوشل میڈیا صارفین نے اس پر حیرت اور دلچسپ تبصرے کیے۔ ایک صارف نے لکھا: “مجھے یقین نہیں آ رہا کہ یہ ویرات کوہلی نہیں بلکہ کوئی اور ہے!” جبکہ ایک اور صارف نے کہا: “جب میں نے پہلی بار ارطغرل غازی دیکھا تو سوچا کہ کوہلی ترک ڈرامے میں کیا کر رہے ہیں؟”۔
خیال رہے کہ ترک اداکار جاوت جیتن گونر نے ارطغرل غازی میں دوغان بے کا کردار ادا کیا تھا۔ یہ ڈرامہ تیرہویں صدی میں مسلمانوں کی عالمی فتوحات اور سلطنت عثمانیہ کے بانی عثمان اول کے والد، ارطغرل کی جدوجہد کی عکاسی کرتا ہے۔ جاوت جیتن گونر کی ویرات کوہلی سے مشابہت کوئی نئی بات نہیں، اس سے قبل بھی ان کی تصاویر سوشل میڈیا پر وائرل ہو چکی ہیں۔
