یوکرین کے صدر ولودومیر زیلنسکی نے ایک انٹرویو میں حیران کن پیشگوئی کی ہے کہ روسی صدر ولادیمیر پیوٹن جلد وفات پا جائیں گے۔
غیر ملکی میڈیا رپورٹس کے مطابق زیلنسکی نے کہا کہ پیوٹن کی صحت تیزی سے خراب ہو رہی ہے اور وہ زیادہ عرصہ زندہ نہیں رہیں گے۔ انہوں نے مزید کہا کہ پیوٹن اپنی موت تک اقتدار میں رہنا چاہتے ہیں اور مغرب کے ساتھ براہ راست تصادم کے خواہاں ہیں۔ تاہم، زیلنسکی نے اس بارے میں کوئی ٹھوس شواہد یا تفصیلات فراہم نہیں کیں کہ وہ کیوں سمجھتے ہیں کہ 72 سالہ روسی صدر زندگی کے آخری مراحل میں ہیں۔
گزشتہ چند برسوں سے پیوٹن کی صحت کے بارے میں کئی قیاس آرائیاں کی جا رہی ہیں، خاص طور پر جب سے روس نے یوکرین پر حملہ کیا۔ کچھ رپورٹس میں دعویٰ کیا گیا ہے کہ پیوٹن کو کینسر یا پارکنسن جیسی اعصابی بیماری لاحق ہو سکتی ہے، تاہم کریملن ان تمام افواہوں کی بارہا تردید کر چکا ہے اور پیوٹن کی خراب صحت کے کوئی ٹھوس شواہد سامنے نہیں آئے۔
اکتوبر 2023 میں پیوٹن کی کچھ تصاویر منظر عام پر آئیں، جن میں ان کے ہاتھوں پر نشانات دیکھے گئے، جب وہ فوجیوں سے ملاقات کر رہے تھے۔ ان نشانات کے باعث یہ قیاس آرائیاں ہوئیں کہ پیوٹن کا کینسر کا علاج جاری ہے، تاہم اس کی اصل وجہ واضح نہیں ہو سکی۔
زیلنسکی کا یہ بیان ایسے وقت میں سامنے آیا ہے جب روس اور یوکرین کے وفود نے سعودی عرب میں امریکی حکام سے ملاقات کی اور توانائی تنصیبات پر حملے اور بحیرہ اسود میں جنگ بندی پر اتفاق کیا۔
یاد رہے کہ 2022 میں ایک روسی انٹیلی جنس افسر نے دعویٰ کیا تھا کہ صدر پیوٹن صرف تین سال مزید زندہ رہیں گے کیونکہ ان میں کینسر کی تشخیص ہو چکی ہے، جو تیزی سے پھیل رہا ہے۔ اسی افسر نے یہ بھی کہا تھا کہ پیوٹن کی بینائی متاثر ہو رہی ہے اور وہ شدید جسمانی کمزوری کا شکار ہیں۔
