اسلام آباد: عالمی مالیاتی فنڈ (آئی ایم ایف) کے ڈائریکٹر کمیونیکیشن جولی کوزیک نے اعلان کیا ہے کہ پاکستان کو کلائمیٹ فنانسنگ کے تحت 1.3 ارب ڈالر فراہم کیے جائیں گے۔
جولی کوزیک نے پریس کانفرنس کے دوران کہا کہ پاکستان کے ساتھ ایکسٹینڈڈ فنڈ فیسیلٹی (ای ایف ایف) پروگرام اور کلائمیٹ فنانسنگ کے حوالے سے الگ الگ فنڈز کی فراہمی پر بات چیت ہوئی، جس میں مثبت پیش رفت ہوئی ہے۔
آئی ایم ایف کے ڈائریکٹر نے بتایا کہ پاکستان کے ساتھ کلائمیٹ فنانسنگ پر مذاکرات کامیاب رہے اور اس پروگرام کے تحت پاکستان کو 1.3 ارب ڈالر 28 ماہ کے دوران فراہم کیے جائیں گے۔
انہوں نے مزید کہا کہ پاکستان کے لیے 37 ماہ کا ایکسٹینڈڈ فنڈ فیسیلٹی (ای ایف ایف) پروگرام ستمبر میں طے پایا تھا، جس کے تحت پاکستان کو مجموعی طور پر 7 ارب ڈالر اقساط میں دیے جائیں گے۔
آئی ایم ایف کے مطابق پاکستان کے ساتھ نئی قسطوں کے لیے اسٹاف لیول معاہدہ 25 مارچ کو طے پایا، اور پاکستان ای ایف ایف پروگرام کے پہلے جائزہ اجلاس میں کامیاب رہا، جس کے بعد پاکستان کو ایک ارب ڈالر کی قسط جلد جاری کر دی جائے گی۔
