میانمار اور تھائی لینڈ میں شدید زلزلے کے باعث ہلاکتوں کی تعداد 1002 سے تجاوز کر گئی جبکہ 2400 سے زائد افراد زخمی ہوئے ہیں۔
غیر ملکی خبر ایجنسی کے مطابق ریسکیو ٹیمیں ملبے میں دبے افراد کو نکالنے میں مصروف ہیں۔ امریکی ایجنسی نے خدشہ ظاہر کیا ہے کہ زلزلے کے باعث ہلاکتوں کی تعداد 10 ہزار سے تجاوز کر سکتی ہے۔
میڈیا رپورٹس کے مطابق میانمار کے دوسرے بڑے شہر منڈالے میں آنے والا زلزلہ انتہائی شدید تھا۔ اس کے جھٹکے 900 کلومیٹر دور تھائی لینڈ کے دارالحکومت بنکاک میں بھی محسوس کیے گئے، جہاں متعدد عمارتیں اور تعمیراتی ڈھانچے منہدم ہو گئے۔
اس کے علاوہ بھارتی ریاستوں میگھالیہ اور منی پور، بنگلہ دیش کے دارالحکومت ڈھاکا اور چین میں بھی زلزلے کے جھٹکے محسوس کیے گئے۔
بنکاک کے حکام کے مطابق انہیں 2000 تعمیراتی ڈھانچوں میں دراڑیں پڑنے کی رپورٹس موصول ہوئی ہیں۔ ایک زیر تعمیر بلند عمارت گرنے سے 10 افراد ہلاک اور 100 مزدور لاپتہ ہیں۔
یاد رہے کہ گزشتہ روز میانمار اور تھائی لینڈ میں شدید زلزلہ محسوس کیا گیا تھا۔ امریکی جیولوجیکل سروے کے مطابق زلزلے کی شدت 7.7 جبکہ گہرائی 10 کلومیٹر تھی۔ زلزلے کا مرکز میانمار کے شہر منڈالے سے 17.2 کلومیٹر دور تھا۔
