بھارتی آل راؤنڈر اور ممبئی انڈینز کے کپتان ہاردک پانڈیا نے انڈین پریمیئر لیگ (آئی پی ایل) کی تاریخ میں نئی مثال قائم کر دی۔ جمعہ کو کھیلے گئے میچ میں لکھنو سپر جائنٹس کے خلاف شاندار بولنگ کرتے ہوئے ہاردک پانڈیا نے ٹی ٹوئنٹی کیرئیر میں پہلی مرتبہ ایک اننگز میں 5 وکٹیں حاصل کیں۔
ممبئی انڈینز کے خلاف لکھنو سپر جائنٹس نے مقررہ 20 اوورز میں 8 وکٹوں کے نقصان پر 203 رنز بنائے۔ اس ہائی اسکورنگ میچ میں ہاردک پانڈیا نے 4 اوورز میں 36 رنز دے کر 5 اہم کھلاڑیوں کو پویلین واپس بھیجا اور یوں وہ آئی پی ایل کی 17 سالہ تاریخ میں 5 وکٹیں لینے والے پہلے کپتان بن گئے۔
ممبئی انڈینز نے 204 رنز کے ہدف کا تعاقب کرتے ہوئے 20 اوورز میں 5 وکٹوں کے نقصان پر 191 رنز بنائے اور یوں لکھنو سپر جائنٹس نے 12 رنز سے کامیابی حاصل کر لی۔
یہ کارنامہ اس لحاظ سے بھی تاریخی ہے کہ اس سے قبل آئی پی ایل میں کسی بھی کپتان کی بہترین بولنگ کارکردگی 16 رنز دے کر 4 وکٹیں تھی، جو 2009 میں رائل چیلنجرز بنگلور کے کپتان انیل کمبلی نے حاصل کی تھیں۔
