اسلام آباد: وزیراعظم پاکستان شہباز شریف نے نجی اسکیم کے تحت حاجیوں کے بروقت انتظامات نہ ہونے اور سعودی پالیسی کو فالو نہ کرنے کے معاملے کا نوٹس لے لیا ہے۔ اس سلسلے میں 70 ہزار حاجیوں کے کوٹے کے لیے انتظامات کے حوالے سے پیدا ہونے والی مشکلات پر وزیراعظم نے فوری کارروائی کرتے ہوئے 3 رکنی حج انتظامی کمیٹی تشکیل دے دی ہے۔
وزیراعظم کے نوٹیفکیشن کے مطابق، تشکیل دی گئی کمیٹی میں سیکرٹری کابینہ، چیئرمین ایف بی آر اور چیف سیکرٹری گلگت بلتستان شامل ہوں گے۔ یہ کمیٹی اپنی رپورٹ اور سفارشات 3 دن کے اندر وزیراعظم کو پیش کرے گی۔
کمیٹی سعودی عرب کی حج پالیسی کو وزارتِ مذہبی امور اور نجی حج آپریٹرز کے ذریعے درست طریقے سے نافذ نہ کرنے کے معاملے کی تحقیقات کرے گی۔ اس کے ساتھ ساتھ، کمیٹی وزارت مذہبی امور کی جانب سے نجی حج آپریٹرز کے لیے مطلوبہ رسمی کارروائیاں مکمل کرانے کی کوششوں کا بھی جائزہ لے گی۔
وزارتِ مذہبی امور اور بین المذاہب ہم آہنگی کمیٹی اس کمیٹی کو سپورٹ فراہم کرے گی تاکہ اس معاملے کی جلد اور موثر تحقیقات کی جا سکیں۔
