اسلام آباد / استنبول: پاکستان اور افغان طالبان نے جنگ بندی جاری رکھنے پر اتفاق کرتے ہوئے سیز فائر برقرار رکھنے کا فیصلہ کر لیا۔ مذاکرات کا اگلا دور 6 نومبر کو استنبول میں ہوگا، جہاں جنگ بندی کے نفاذ کے طریقہ کار کو حتمی شکل دی جائے گی۔
ترکیہ کی وزارتِ خارجہ کی جانب سے جاری مشترکہ اعلامیے کے مطابق، مذاکرات 25 سے 30 اکتوبر تک استنبول میں منعقد ہوئے۔ ان مذاکرات کا مقصد دوحہ میں 18 اور 19 اکتوبر کو طے پانے والی جنگ بندی پر عمل درآمد کو یقینی بنانا تھا۔
اعلامیے میں کہا گیا کہ فریقین نے سیز فائر جاری رکھنے اور امن کے قیام کے لیے نگرانی و تصدیقی نظام قائم کرنے پر اتفاق کیا ہے، جو کسی بھی فریق کی جانب سے جنگ بندی کی خلاف ورزی پر جرمانہ عائد کرنے کا اختیار رکھے گا۔
ترکیہ اور قطر، جو ثالث کے طور پر مذاکرات میں شامل تھے، نے دونوں ممالک کے مثبت اور تعمیری کردار کو سراہا اور خطے میں امن و استحکام کے لیے تعاون جاری رکھنے کے عزم کا اظہار کیا۔
وزارتِ خارجہ کے اعلامیے میں مزید کہا گیا کہ اگلا اجلاس 6 نومبر کو استنبول میں ہوگا، جس میں سیز فائر کے قواعد و ضوابط کو حتمی شکل دی جائے گی۔
وفاقی وزیرِ اطلاعات عطا تارڑ نے مشترکہ اعلامیے کو پاکستان کے مؤقف کی تائید قرار دیتے ہوئے کہا کہ افغان طالبان نے تسلیم کر لیا ہے کہ اب دہشت گردی کی کارروائیاں بند ہوں گی۔ ان کے مطابق، “جنگ بندی کی خلاف ورزی کرنے والے فریق کے خلاف سزا کا تعین کیا جائے گا۔”
انہوں نے مزید کہا کہ پاک افغان سرحد کھولنے سے متعلق فیصلہ صورتحال کا جائزہ لینے کے بعد کیا جائے گا۔
یاد رہے کہ دونوں ممالک کے درمیان کشیدگی اس وقت شدید ہو گئی تھی جب 11 اکتوبر کو افغانستان کی جانب سے پاکستانی سرحد پر حملے کیے گئے۔ اس واقعے سے چند روز قبل طالبان نے پاکستان پر افغان سرزمین پر فضائی حملوں کا الزام لگایا تھا۔
بعد ازاں، 19 اکتوبر کو دوحہ میں دونوں ممالک کے درمیان جنگ بندی معاہدہ طے پایا، جس کے بعد استنبول میں 4 روزہ مذاکرات ہوئے۔ اگرچہ ابتدا میں بات چیت تعطل کا شکار رہی، لیکن ترکیہ اور قطر کی کامیاب سفارتی کوششوں سے فریقین دوبارہ مذاکرات کی میز پر آئے۔
اب توقع ہے کہ 6 نومبر کو استنبول میں ہونے والے مذاکرات میں جنگ بندی کے حتمی قواعد و ضوابط طے پا جائیں گے، جو دونوں ممالک کے درمیان پائیدار امن کی بنیاد بن سکتے ہیں۔
