اسلام آباد: وزیراعظم کے سیاسی مشیر رانا ثنااللہ نے کہا ہے کہ حکومت 27ویں آئینی ترمیم کو مکمل افہام و تفہیم اور باہمی اتفاقِ رائے سے منظور کرنے کی کوشش کر رہی ہے۔
وفاقی دارالحکومت میں نجی ٹی وی پروگرام میں گفتگو کرتے ہوئے رانا ثنااللہ نے کہا کہ آئینی امور پر پیش رفت صرف بات چیت اور تعاون سے ممکن ہے۔ اُن کا کہنا تھا کہ 18ویں ترمیم کے بعد وفاق اور صوبوں کے درمیان بعض پہلوؤں میں عدم توازن پیدا ہوا ہے، جسے مل بیٹھ کر حل کرنے کی ضرورت ہے۔
رانا ثنااللہ نے واضح کیا کہ صوبوں کو چلانا فیڈریشن کی اور فیڈریشن کو چلانا صوبوں کی ذمہ داری ہے، اس لیے تمام فریقین کو تعاون اور بات چیت کے ذریعے آگے بڑھنا ہوگا۔ اُن کے مطابق اس سلسلے میں ایک مثبت پیش رفت شروع ہوچکی ہے اور مختلف آئینی تجاویز زیرِ غور ہیں، جن کے ذریعے این ایف سی ایوارڈ کے حصے کو متاثر کیے بغیر آئینی ہم آہنگی پیدا کرنے کی کوشش کی جا رہی ہے۔
وزیراعظم کے مشیر نے کہا کہ 27ویں آئینی ترمیم کے حوالے سے تمام اتحادی جماعتوں اور متعلقہ فریقین کو اعتماد میں لینے کا فیصلہ کیا گیا ہے۔ اُنہوں نے کہا کہ وہی ترمیم آگے بڑھے گی جس پر تمام جماعتوں کا اتفاق ہوگا، جبکہ جن نکات پر اختلاف رہے گا، اُنہیں آئندہ کے لیے زیرِ بحث رکھا جائے گا۔
رانا ثنااللہ نے مزید کہا کہ ترمیمی عمل کے دوران دیگر اُمور جیسے بلدیاتی نظام، اوورسیز پاکستانیوں کی انتخابی شمولیت، ججوں کے تبادلے اور الیکشن کمیشن کے دائرۂ کار پر بھی اتفاقِ رائے سے فیصلے کیے جائیں گے۔
