راولپنڈی: پاک بحریہ کے جہاز پی این ایس سیف نے بیرونِ ملک تعیناتی کے دوران مالدیپ کی بندرگاہ مالے کا دورہ کیا، جہاں آمد پر مالدیپ کے حکام کی جانب سے پرتپاک استقبال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق دورے کے دوران مشن کمانڈر کموڈور محمد ذیشان نبی شیخ نے چیف آف ڈیفنس فورس میجر جنرل ابراہیم ہلمی، کمانڈنٹ کوسٹ گارڈ میجر جنرل محمد سلیم اور پاکستان کے ہائی کمشنر وائس ایڈمرل (ر) فیصل رسول لودھی سے علیحدہ علیحدہ ملاقاتیں کیں۔
ان ملاقاتوں میں باہمی دلچسپی کے امور، بحری تعاون اور میری ٹائم سکیورٹی سے متعلق معاملات پر تبادلہ خیال کیا گیا۔ اس موقع پر مشن کمانڈر نے چیف آف دی نیول اسٹاف ایڈمرل نوید اشرف کی جانب سے مالدیپ کے عوام کے لیے نیک خواہشات کا پیغام بھی پہنچایا۔
مالدیپ میں قیام کے دوران میزبان ملک کے سرکاری حکام، مختلف ممالک کے سفیروں اور پاکستانی کمیونٹی کے ارکان نے جہاز کا دورہ کیا۔ جہاز کو عوام کے لیے بھی کھولا گیا جس سے دونوں ممالک کے عوامی تعلقات کو مزید تقویت ملی۔
دورے کے اختتام پر پی این ایس سیف نے مالدیپ کوسٹ گارڈ کے جہازوں کے ساتھ مشترکہ بحری مشق میں حصہ لیا۔ اس مشق کا مقصد دفاعی تعاون میں اضافہ اور دونوں بحری افواج کے درمیان آپریشنل ہم آہنگی کو فروغ دینا تھا۔
ترجمان پاک فوج کے مطابق، مالدیپ میں پاک بحریہ کے جہازوں کے باقاعدہ دورے دونوں ممالک کے دوطرفہ تعلقات کی مضبوطی کی علامت ہیں، اور یہ سلسلہ مستقبل میں باہمی تعاون اور خطے میں میری ٹائم سکیورٹی کے فروغ کا باعث بنے گا۔
