باکو: وزیراعظم شہباز شریف نے آذربائیجان کے صدر الہام علیوف سے صدارتی محل میں ملاقات کی، جس میں فیلڈ مارشل سید عاصم منیر نے بھی شرکت کی۔
ملاقات کے آغاز میں وزیراعظم نے آذربائیجان کی حکومت اور عوام کو یومِ فتح کی مبارکباد دی اور تقریب میں شرکت کی دعوت دینے پر صدر علیوف کا شکریہ ادا کیا۔ شہباز شریف نے کہا کہ آذربائیجان کی فتح کشمیری اور فلسطینی عوام کے لیے اُمید کی کرن ہے۔
دونوں رہنماؤں کے درمیان ہونے والی ملاقات میں دوطرفہ تعلقات کا تفصیلی جائزہ لیا گیا اور مختلف شعبوں میں کثیرالجہتی تعاون کو مزید مضبوط بنانے پر اتفاق کیا گیا۔ وزیراعظم شہباز شریف نے آذربائیجان کے صدر کو دورۂ پاکستان کی دعوت دی اور آرمینیا کے ساتھ تاریخی امن معاہدے میں اُن کے کردار کو سراہا۔
دوسری جانب صدر الہام علیوف نے وزیراعظم کی دعوت خوش دلی سے قبول کرلی اور آذربائیجان کی جانب سے پاکستان کی مسلسل حمایت پر شکریہ ادا کیا۔
صدر علیوف نے مزید کہا کہ آذربائیجان جنوبی ایشیا میں علاقائی استحکام کے لیے پاکستان کے کردار کو قدر کی نگاہ سے دیکھتا ہے اور مستقبل میں بھی دونوں ممالک کے درمیان تعاون کے نئے دور کا آغاز ہوگا۔
