راولپنڈی: خیبرپختونخوا کے ضلع ڈیرہ اسماعیل خان میں سیکیورٹی فورسز نے انٹیلی جنس اطلاعات پر کارروائی کرتے ہوئے فتنۃ الخوارج کے سرغنہ عالم محسود سمیت 10 دہشتگردوں کو ہلاک جبکہ 4 کو زخمی کر دیا۔
سیکیورٹی ذرائع کے مطابق یہ آپریشن کلاچی کے علاقے میں دہشت گردوں کی موجودگی کی مصدقہ اطلاع پر کیا گیا۔ کارروائی کے دوران فورسز نے علاقے کو گھیرے میں لے کر شدید مقابلے کے بعد دہشتگردوں کو مار گرایا۔ ہلاک ہونے والوں میں سے 4 دہشتگردوں کا تعلق افغانستان سے تھا۔
ذرائع کے مطابق دہشتگردوں کے قبضے سے بھاری مقدار میں بارودی مواد، خودکش جیکٹس، آئی ای ڈیز اور جدید اسلحہ برآمد کیا گیا، جسے بڑے حملوں میں استعمال کیا جا سکتا تھا۔
مزید بتایا گیا کہ ہلاک دہشتگرد عالم محسود متعدد بڑے حملوں میں ملوث رہا ہے۔ وہ 2008 کے نواز کوٹ پوسٹ حملے، بنوں جیل حملے اور مختلف آرمی پوسٹس پر دہشتگردی کی کارروائیوں کا ماسٹر مائنڈ تھا۔
