ماسکو میں شنگھائی تعاون تنظیم (SCO) کے اجلاس کے موقع پر پاکستان کے نائب وزیراعظم و وزیرِ خارجہ اسحاق ڈار نے روسی نائب وزیراعظم الیکسی اوورچک سے اہم ملاقات کی۔ ملاقات میں دوطرفہ تجارت، زمینی و ریلوے رابطوں اور اقتصادی تعاون کو فروغ دینے کے مختلف پہلوؤں پر تفصیلی بات چیت کی گئی۔
اسحاق ڈار کے مطابق ملاقات “انتہائی جامع اور نتیجہ خیز” رہی، جس میں پاکستان اور روس کے درمیان تجارتی حجم میں اضافے، علاقائی اقتصادی روابط کو مضبوط بنانے اور ریلوے رابطوں کو بہتر بنانے کے امکانات پر غور کیا گیا۔ انہوں نے روس کی گرمجوش میزبانی پر شکریہ ادا کیا اور بتایا کہ وہ ماسکو سے روانہ ہونے والے تھے مگر روسی وزیرِ خارجہ سرگئی لاوروف سے ملاقات کے لیے اپنا قیام خصوصی طور پر بڑھایا۔
روسی نائب وزیراعظم الیکسی اوورچک نے کہا کہ پاکستان اور روس کا شراکت داری پر مبنی رشتہ جنوبی ایشیا کے لیے روس کی پالیسی کا اہم ستون ہے۔ ان کے مطابق دونوں ممالک کے تعلقات مضبوط بنیادوں پر آگے بڑھ رہے ہیں اور عالمی فورمز، خصوصاً ایس سی او اور اقوام متحدہ میں قریبی تعاون جاری ہے۔
ملاقات میں علاقائی و بین الاقوامی صورتحال پر بھی تبادلہ خیال کیا گیا، جبکہ دونوں ممالک نے مستقبل میں باہمی مشاورت اور عملی تعاون مزید بڑھانے کے عزم کا اعادہ کیا۔
