راولپنڈی: پاک فوج کے شعبہ تعلقات عامہ (آئی ایس پی آر) نے بتایا ہے کہ ڈیرہ اسماعیل خان میں سکیورٹی فورسز نے بھارتی پراکسی گروپ فتنہ الخوارج سے تعلق رکھنے والے دہشت گردوں کے ٹھکانوں کو نشانہ بنا کر کامیاب آپریشن انجام دیا۔ اس کارروائی میں 22 دہشت گرد ہلاک ہوئے۔
آئی ایس پی آر کے مطابق آپریشن انٹیلی جنس معلومات کی بنیاد پر کیا گیا اور دہشت گردوں کے ٹھکانے پر شدید فائرنگ کے تبادلے کے بعد 22 دہشت گرد مارے گئے۔ علاقے میں کسی بھی ممکنہ بھارتی اسپانسرڈ دہشت گرد کو ختم کرنے کے لیے سینیٹائزیشن آپریشن بھی جاری ہے۔
پاک فوج کے ترجمان نے کہا کہ سیکیورٹی فورسز اور قانون نافذ کرنے والے ادارے وژن “عزم استحکام” کے تحت انسداد دہشت گردی کی مہم پوری شدت سے جاری رکھے ہوئے ہیں اور ملک میں امن و استحکام قائم رکھنے کے لیے تمام وسائل بروئے کار لائے جا رہے ہیں۔
