کولمبو: سری لنکا شدید بارشوں اور سمندری طوفان دتوا کے باعث بدترین سیلاب کی لپیٹ میں ہے، جہاں ہلاکتوں کی تعداد بڑھ کر 334 ہو گئی ہے۔ حکام کے مطابق بارشوں، سیلاب اور متعدد ڈیم ٹوٹنے کے واقعات سے دو لاکھ سے زائد افراد بے گھر ہو چکے ہیں جبکہ 400 سے زیادہ افراد لاپتہ ہیں۔
حکام کا کہنا ہے کہ ملک بھر میں آنے والے سیلاب سے 10 لاکھ سے زیادہ افراد متاثر ہوئے ہیں اور ہنگامی امدادی سرگرمیاں مسلسل جاری ہیں۔ دارالحکومت کولمبو کے نشیبی علاقوں میں پانی کی سطح بڑھنے کے بعد لوگوں کا انخلاء تیز کر دیا گیا ہے، جبکہ ریسکیو ٹیمیں متاثرہ علاقوں میں پھنسے ہوئے شہریوں کو محفوظ مقامات پر منتقل کر رہی ہیں۔
حکومت نے ملک بھر میں ایمرجنسی امداد کے لیے فوج، پولیس اور رضاکار ٹیموں کو تعینات کر دیا ہے، جبکہ متاثرہ خاندانوں کو فوری خوراک، رہائش اور طبی مدد فراہم کی جا رہی ہے۔
