پشاور: عوامی نیشنل پارٹی کے ترجمان انجینئر احسان اللہ خان نے کہا ہے کہ خیبر پختونخوا کی گورنر شپ کے حوالے سے اے این پی سے تاحال کسی نے رابطہ نہیں کیا۔ میڈیا سے گفتگو کرتے ہوئے انہوں نے واضح کیا کہ اگر اس حوالے سے کوئی پیش کش ہوئی تو معاملہ پارٹی مشاورت کے بعد ہی طے کیا جائے گا۔
ان کا کہنا تھا کہ صوبے میں حکومت کی رٹ نظر نہیں آ رہی اور موجودہ صوبائی حکومت کارکردگی دکھانے میں ناکام ہے۔ انہوں نے مزید کہا کہ اگر تحریک انصاف کو احتجاج کرنا ہے تو حکومت چھوڑ دے، کیونکہ اے این پی جمہوری عمل اور اداروں کے تسلسل پر مکمل یقین رکھتی ہے۔
واضح رہے کہ خیبر پختونخوا میں گورنر راج کی تجویز پر غور کے بعد ممکنہ گورنر کے طور پر اے این پی کے مرکزی رہنما اور سابق وزیراعلیٰ امیر حیدر خان ہوتی کا نام بھی سامنے آ رہا ہے۔
