کُرم: خیبر پختونخوا کے علاقے سینٹرل کُرم میں چنارک پولیس چیک پوسٹ پر مسلح حملے کی کوشش ناکام بنا دی گئی۔ ڈی پی او کُرم کے مطابق پولیس کی بروقت اور مؤثر جوابی کارروائی کے نتیجے میں 4 حملہ آور ہلاک جبکہ 6 زخمی ہوگئے، تاہم فائرنگ کے تبادلے میں پولیس کے دو جوان شہید بھی ہوئے۔
مقامی ذرائع کا کہنا ہے کہ حملہ آوروں نے چنارک تھانے کی چیک پوسٹ کو آگ لگا دی، جبکہ دونوں جانب سے فائرنگ کئی گھنٹے تک جاری رہی۔ ڈی پی او نے بتایا کہ موقع پر اضافی نفری روانہ کی گئی جس نے تین گھنٹے تک بہادری کے ساتھ مقابلہ کیا اور علاقے کو کلیئر کرایا۔
وفاقی وزیر داخلہ محسن نقوی نے کارروائی میں 4 حملہ آوروں کی ہلاکت پر پولیس کی پیشہ ورانہ صلاحیتوں کو سراہا اور کہا کہ بہادر اہلکاروں نے بروقت کارروائی کر کے خطرناک منصوبہ ناکام بنا دیا۔ انہوں نے شہید اہلکاروں کو خراجِ عقیدت پیش کیا اور لواحقین سے دلی ہمدردی کا اظہار کیا۔
