اسلام آباد: وزیرِ اعظم محمد شہباز شریف نے پاکستان انٹرنیشنل ایئر لائنز (PIA) کی نجکاری میں حصہ لینے والی تمام کارپوریٹ شخصیات اور کمپنیوں کے نمائندوں سے ملاقات کی۔
ملاقات کے دوران وزیراعظم نے کہا کہ پی آئی اے کی بڈنگ 23 دسمبر 2025 کو ہو گی اور یہ عمل ملک بھر میں تمام میڈیا پر براہِ راست نشر کیا جائے گا۔ انہوں نے کہا کہ نجکاری میں شفافیت اور میرٹ اولین ترجیح ہے اور بڈنگ کے عمل کو مکمل کھلا اور شفاف رکھا جائے گا۔
شہباز شریف نے کہا کہ پی آئی اے کا کھویا ہوا تشخص بحال کرنے اور قومی ایئر لائن کو جدید تقاضوں سے ہم آہنگ کرنے کے لیے نجکاری کا عمل سہل اور مؤثر انداز میں جاری ہے۔ انہوں نے امید ظاہر کی کہ پی آئی اے دوبارہ اپنی روایت “Great People to Fly With” پر پورا اترے گی اور دنیا بھر میں پروازوں کی بحالی سے سمندر پار مقیم پاکستانیوں کو سہولت فراہم ہوگی۔
وزیرِ اعظم نے مزید کہا کہ قومی ایئر لائن کو عصری تقاضوں سے ہم آہنگ کرنا پاکستان کے سیاحتی شعبے کی ترقی کے لیے بھی انتہائی ضروری ہے اور بڈرز اس اہم ذمہ داری کو سنبھال کر پی آئی اے کے تشخص کی بحالی اور ترقی پر اپنی توانائیاں مرکوز کریں گے۔
اس ملاقات میں وفاقی وزراء محمد اسحاق ڈار، احد خان چیمہ، محمد اورنگزیب، عطاء اللہ تارڑ، اعظم نذیر تارڑ، سردار اویس خان لغاری، وزیر مملکت بلال اظہر کیانی، مشیر وزیرِ اعظم محمد علی، معاون خصوصی ہارون اختر اور دیگر اعلیٰ حکام بھی شریک ہوئے۔ بڈرز نے حکومت کی جانب سے پی آئی اے کی نجکاری میں پیشہ ورانہ اور شفاف طریقہ کار کی تعریف کی۔
