کراچی: الیکشن کمیشن آف پاکستان نے سندھ اسمبلی کے حلقہ پی ایس 9 شکارپور کے ضمنی انتخاب کے حتمی اور سرکاری نتائج کا اعلان کرتے ہوئے فارم 47 جاری کر دیا ہے۔
الیکشن کمیشن کے مطابق ریٹرننگ افسر کی جانب سے جاری کردہ فارم 47 کے تحت پاکستان پیپلز پارٹی کے امیدوار آغا شہباز خان درانی کامیاب قرار پائے ہیں، جبکہ جمعیت علمائے اسلام (جے یو آئی) پاکستان کے امیدوار مولانا رشد اللہ شاہ دوسرے نمبر پر رہے۔
سرکاری نتائج کے مطابق آغا شہباز خان درانی نے 72 ہزار 964 ووٹ حاصل کر کے واضح برتری کے ساتھ کامیابی حاصل کی۔ مولانا رشد اللہ شاہ 9 ہزار 489 ووٹ لے کر دوسرے نمبر پر رہے۔ ضمنی انتخاب میں مجموعی طور پر 178 پولنگ اسٹیشنز پر 88 ہزار 17 ووٹ کاسٹ کیے گئے۔
ترجمان الیکشن کمیشن سندھ کے مطابق پی ایس 9 شکارپور میں ووٹر ٹرن آؤٹ 31.68 فیصد رہا، جو ضمنی انتخابات کے تناسب سے اوسط قرار دیا جا رہا ہے۔
واضح رہے کہ سندھ اسمبلی کی یہ نشست سابق اسپیکر سندھ اسمبلی آغا سراج درانی کے انتقال کے باعث خالی ہوئی تھی، جس پر ضمنی انتخاب منعقد کیا گیا۔
