اوباڑو: پولیس نے کارروائی کرتے ہوئے مسافر بس سے اغوا کیے گئے 19 افراد میں سے 10 مغویوں کو بازیاب کرا لیا ہے، جبکہ باقی افراد کی تلاش کے لیے سرچ آپریشن جاری ہے۔ پولیس کے مطابق بازیابی سومیانی کے علاقے میں مقابلے کے بعد عمل میں آئی۔
ڈی ایس پی اوباڑو کا کہنا ہے کہ پولیس اور ڈاکوؤں کے درمیان فائرنگ کا تبادلہ ہوا، جس کے بعد ملزمان فرار ہو گئے۔ علاقے کی مکمل ناکہ بندی کر دی گئی ہے تاکہ باقی مغویوں کو بھی جلد بازیاب کرایا جا سکے۔ پولیس کے مطابق بازیاب ہونے والے چند مسافر زخمی ہیں جنہیں موقع پر ابتدائی طبی امداد فراہم کی جا رہی ہے۔
واضح رہے کہ صادق آباد سے کوئٹہ جانے والی مسافر بس کو راستے میں ڈاکوؤں نے لوٹ لیا تھا۔ بس میں خواتین سمیت 27 افراد سوار تھے، تاہم ڈاکو خواتین کو چھوڑ کر 19 مرد مسافروں کو اغوا کر کے ساتھ لے گئے تھے۔
عینی شاہدین کے مطابق ڈاکوؤں کی تعداد درجنوں میں تھی اور وہ جدید اسلحے سے لیس تھے۔ واقعے کی اطلاع ملتے ہی پولیس اور رینجرز کی بھاری نفری جائے وقوعہ پر پہنچ گئی اور علاقے کو گھیرے میں لے لیا گیا۔
ابتدائی طور پر پولیس کا کہنا تھا کہ کچھ مسافر خوف کے باعث قریبی گنے کی فصل میں چھپ گئے ہیں، تاہم بعد ازاں اغوا کی تصدیق سامنے آئی جس کے بعد باقاعدہ آپریشن شروع کیا گیا۔
