لندن میں پاکستان کی علمی میدان میں اہم کامیابی حاصل ہوئی جب آکسفورڈ یونین کے تصدیق شدہ مباحثے میں بھارتی وفد عین وقت پر دستبردار ہو گیا، جس کے بعد پاکستان بلا مقابلہ فاتح قرار پایا۔ پاکستان ہائی کمیشن لندن کے مطابق جنرل (ر) زبیر محمود حیات، حنا ربانی کھر اور ڈاکٹر محمد فیصل مباحثے کے لیے موجود تھے، لیکن بھارتی مقررین—جن میں جنرل ایم ایم نروانے، ڈاکٹر سبرامنیَم سُوامی اور سچن پائلٹ شامل تھے—نے مباحثے سے دستبرداری اختیار کی۔
ہائی کمیشن کے مطابق بھارت نے پاکستانی وفد کے مصدقہ اسپیکرز کے انکار کے بعد چند غیر معروف اور کم درجے کے مقررین پیش کرنے کی کوشش کی، جو مباحثے کے معیار پر پورا نہیں اترے۔ اس اقدام نے آکسفورڈ یونین اور جامعہ آکسفورڈ دونوں کی ساکھ اور توازن کو متاثر کیا۔
قرارداد کے مطابق بحث کا موضوع تھا کہ بھارت کی پاکستان پالیسی عوامی جذبات بھڑکانے کی حکمت عملی ہے۔ ہائی کمیشن کے مطابق بھارتی وفد نے ممکنہ سوالات اور عوامی ووٹنگ کا سامنا کرنے سے گریز کیا، جس سے ان کے بیانیے کی کمزوری واضح ہوئی۔
پاکستان ہائی کمیشن نے کہا کہ بھارتی وفد کی عدم شرکت ان کے اپنے عوام کے سامنے بھی سوالیہ نشان بن گئی ہے، جبکہ پاکستانی وفد دلیل، مکالمے اور قانونی مؤقف کے ساتھ بحث کے لیے تیار تھا۔ ہائی کمیشن کے مطابق یہ مئی 2025 کے بعد بھارت کی سفارتی و بیانیاتی ناکامیوں کی تازہ مثال ہے۔
پاکستان کے موقف کے مطابق علمی مباحثے میں دلیل اور مکالمے کی فتح حاصل کرنے کے بعد یہ واضح ہو گیا ہے کہ بھارت مباحثہ اور جواب دہی کے لیے تیار نہیں، بلکہ پسپائی کو حکمت عملی کے طور پر اپناتا ہے۔
