واشنگٹن: امریکی صدر ڈونلڈ ٹرمپ نے روسی تیل کی خریداری کے معاملے پر تعاون نہ کرنے کی صورت میں بھارت پر اضافی ٹیرف عائد کرنے کا عندیہ دے دیا ہے، جس سے دونوں ممالک کے درمیان جاری تجارتی مذاکرات پر اثر پڑنے کا امکان ظاہر کیا جا رہا ہے۔
غیر ملکی خبر رساں اداروں کے مطابق صدر ٹرمپ نے کہا ہے کہ امریکا، روسی تیل کے حوالے سے بھارت کے مؤقف اور اقدامات کا باریک بینی سے جائزہ لے رہا ہے۔ ان کا کہنا تھا کہ اگر نئی دہلی نے اس معاملے پر واشنگٹن کے ساتھ تعاون نہ کیا تو بھارت پر درآمدی ٹیرف میں اضافہ کیا جا سکتا ہے۔
امریکی صدر کا یہ بیان ایسے وقت میں سامنے آیا ہے جب امریکا اور بھارت کے درمیان تجارتی امور پر مذاکرات جاری ہیں۔ صدر ٹرمپ اس سے قبل یہ دعویٰ بھی کر چکے ہیں کہ بھارتی وزیراعظم نریندر مودی نے انہیں یقین دہانی کرائی تھی کہ بھارت روسی تیل کی خریداری بند کر دے گا۔
تاہم اس دعوے کے بعد بھارت کی جانب سے نہ تو کسی قسم کی باضابطہ تصدیق سامنے آئی اور نہ ہی اس کی تردید کی گئی، جس کے باعث معاملہ بدستور غیر واضح ہے۔ مبصرین کے مطابق اس بیان سے دونوں ممالک کے تعلقات میں تناؤ پیدا ہو سکتا ہے۔
