اسلام آباد: حکومت کی جانب سے عوام کو ریلیف دینے کے لیے ایک خوش آئند اقدام کیا گیا ہے۔ پاور ڈویژن نے بجلی ایک روپے 71 پیسے فی یونٹ سستی کرنے کا نوٹیفکیشن جاری کر دیا ہے۔
یہ فیصلہ نیپرا کی جانب سے بھیجے گئے حالیہ مشورے کے بعد کیا گیا، جس میں بجلی کی قیمت میں کمی کی سفارش کی گئی تھی۔ پاور ڈویژن کے جاری کردہ نوٹیفکیشن کے مطابق یہ کمی پورے ملک کے صارفین پر لاگو ہوگی، بشمول کے الیکٹرک صارفین، تاہم لائف لائن صارفین اس رعایت سے مستفید نہیں ہو سکیں گے۔
یہ کمی اپریل 2025 سے جون 2025 تک کے لیے ہوگی، اور اس کا مقصد عوام کو مہنگائی کے دباؤ سے کچھ ریلیف دینا ہے۔ پاور ڈویژن نے بتایا ہے کہ قیمت میں یہ کمی وفاقی حکومت کی جانب سے فراہم کردہ اضافی سبسڈی کے تحت کی گئی ہے۔
