ایچ بی ایل پاکستان سپر لیگ (پی ایس ایل) 2025 کے دوسرے مقابلے میں کوئٹہ گلیڈی ایٹرز نے شاندار کھیل پیش کرتے ہوئے پشاور زلمی کو 80 رنز سے شکست دے دی۔
کراچی کے نیشنل اسٹیڈیم میں کھیلے گئے اس میچ میں پشاور زلمی نے ٹاس جیت کر پہلے بولنگ کا فیصلہ کیا۔ کوئٹہ گلیڈی ایٹرز نے اس فیصلے کا بھرپور فائدہ اٹھایا اور مقررہ 20 اوورز میں صرف 3 وکٹوں کے نقصان پر 216 رنز بنائے۔
کوئٹہ کی جانب سے کپتان سعود شکیل اور فن ایلن نے زبردست آغاز فراہم کیا اور دونوں کے درمیان 88 رنز کی شراکت قائم ہوئی۔ سعود شکیل نے 59 جبکہ فن ایلن نے 53 رنز کی جارحانہ اننگز کھیلی۔ حسن نواز نے 41، کوشال مینڈس نے 35 اور رائیلی روسو نے 21 رنز کا اضافہ کیا۔
پشاور کی جانب سے علی رضا، سفیان مقیم اور جوزف نے ایک ایک وکٹ حاصل کی۔
جواب میں پشاور زلمی کی پوری ٹیم 16ویں اوور میں صرف 136 رنز پر ڈھیر ہوگئی۔ صائم ایوب 50 رنز بنا کر نمایاں بلے باز رہے جبکہ حسین طلعت نے 35 اور مچل اوون نے 31 رنز اسکور کیے۔
کوئٹہ کے اسپنر ابرار احمد نے تباہ کن بولنگ کا مظاہرہ کرتے ہوئے 4 کھلاڑیوں کو آؤٹ کیا، جبکہ محمد عامر اور عثمان طارق نے 2، 2 وکٹیں حاصل کیں۔
