62 سالہ اداکارہ کی شاندار واپسی، فلم “The Substance” میں اداکاری کے جوہر دکھائے
ہالی وڈ کی مایہ ناز اور سینئر اداکارہ ڈیمی مور ایک بار پھر شہ سرخیوں میں ہیں۔ تازہ ترین خبروں کے مطابق، مشہور امریکی جریدے پیپلز میگزین نے ڈیمی مور کو دنیا کی خوبصورت ترین خاتون قرار دیا ہے۔ 62 سالہ ڈیمی نہ صرف خوبصورتی بلکہ باہمت اور متاثر کن شخصیت کا بھی بہترین نمونہ بن کر ابھری ہیں۔
ڈیمی مور نے حال ہی میں فلم “The Substance” میں شاندار اداکاری کے ذریعے شائقین اور ناقدین کے دل جیت لیے۔ اس کردار پر انہیں گولڈن گلوب، اسکرین ایکٹرز گلڈ، سیٹلائٹ اور کریٹکس چوائس جیسے بڑے ایوارڈز سے نوازا گیا، جب کہ وہ آسکر ایوارڈ کی دوڑ میں بھی شامل ہیں۔
اداکارہ نے فلم میں ایک عمر رسیدہ انسٹرکٹر کا کردار نبھایا، جسے ناقدین نے نہایت حقیقت پسندانہ اور جذباتی قرار دیا۔ اس موقع پر ڈیمی مور نے انکشاف کیا کہ کچھ سال قبل ایک پروڈیوسر نے انہیں ’پاپ کارن اداکارہ‘ کہہ کر مسترد کر دیا تھا، اور وہ سمجھنے لگی تھیں کہ ان کا کریئر ختم ہو چکا ہے۔ مگر آج وہ ایک نئی توانائی اور اعتماد کے ساتھ سامنے آئی ہیں۔
ڈیمی مور کا کہنا ہے کہ اب وہ اپنی خوبصورتی کو دوسروں کی نظر سے نہیں بلکہ اپنے اندر کے احساسات اور تجربات سے پرکھتی ہیں۔ انہوں نے کہا کہ وہ اب اپنی جسمانی اور ذہنی صحت پر مکمل توجہ دیتی ہیں، نباتاتی غذا کا استعمال، مراقبہ، اور مناسب نیند کو زندگی کا حصہ بنا چکی ہیں۔
اداکارہ نے یہ بھی بتایا کہ وہ آج بھی روزانہ ایک ریڈ بُل پیتی ہیں، اور اپنی بیٹیوں کے ساتھ قریبی تعلق رکھتی ہیں۔ نانی بننے کا تجربہ بھی ان کے لیے خوشی اور سکون کا باعث ہے۔ اس کے علاوہ، وہ اپنے سابق شوہر بروس وِلس سے بھی رابطے میں ہیں اور ان کی سالگرہ پر خاص پیغام بھی بھیجا تھا۔
