مقبوضہ کشمیر کے علاقے پہلگام میں ہونے والے حالیہ واقعے کے بعد بھارت ایک بار پھر پاکستان کے خلاف سیاسی اور سفارتی سطح پر محاذ آرائی میں مصروف ہے۔ اس بار بھارتی کرکٹ بورڈ (بی سی سی آئی) نے پاکستان کے ساتھ کسی بھی سطح پر کرکٹ کھیلنے سے انکار کر دیا ہے، جس سے پاک بھارت کرکٹ تعلقات ایک بار پھر خطرے میں پڑ گئے ہیں۔
میڈیا رپورٹس کے مطابق، بھارتی کرکٹ بورڈ نے مودی سرکار کے دباؤ میں آ کر پاکستان کے ساتھ کرکٹ سیریز سے صاف انکار کر دیا ہے۔ بھارتی بورڈ کے ترجمان کا کہنا ہے کہ سیکیورٹی وجوہات اور موجودہ کشیدہ سفارتی صورتحال کو مدنظر رکھتے ہوئے پاکستان کے ساتھ کسی بھی قسم کے کرکٹ مقابلے ممکن نہیں۔
مزید برآں، بی سی سی آئی نے دھمکی آمیز انداز اپناتے ہوئے کہا ہے کہ وہ آئی سی سی ایونٹس میں پاک بھارت میچز پر بھی نظرثانی کر سکتا ہے۔ اس بیان کے بعد ایشیا کپ اور چیمپئنز ٹرافی جیسے بڑے ٹورنامنٹس کے انعقاد پر بھی سوالات اٹھنے لگے ہیں۔
یہ پہلا موقع نہیں کہ بھارت نے کرکٹ کو سیاست کا نشانہ بنایا ہو۔ ماضی میں بھی کئی بار بی سی سی آئی نے دو طرفہ سیریز کی راہ میں رکاوٹیں کھڑی کی ہیں، جس سے دونوں ممالک کے کرکٹ شائقین کو مایوسی کا سامنا کرنا پڑا۔
دوسری جانب، بھارتی بورڈ کے اس بیان پر پاکستان کرکٹ بورڈ (پی سی بی) کی جانب سے تاحال کوئی باضابطہ ردعمل سامنے نہیں آیا، تاہم توقع کی جا رہی ہے کہ پی سی بی اس مسئلے کو آئی سی سی اور ایشین کرکٹ کونسل کے فورمز پر اٹھائے گا۔
